Durangoko Andereak indarkeria matxistaren aurkako elkarteak feminismoaren aurkako jazarpenari erantzuteko kanpaina bat abiarazi du sare sozialetan, “gizartearentzako minbizia” dela dioten karteletan islatua. Kolektiboak poltsan errotuladore bat eramatera animatzen ditu emakumeak, mezu horiek euskarri berberetan zuzentzeko.

Aktibista batzuk herriko hainbat tokitan aritu dira dagoeneko. Andereak kezkatuta agertu da matxismoaren gorakadarekin: “Kezkagarria da gazte askok indarkeria matxista ukatzea eta feminismoa mehatxutzat hartzea mundura justizia ekartzeko gai den ideologia bakarra izanda”. Gogorarazi dutenez, “patriarkatua gizonek emakumeekiko eta mendeko postuetan dauden subjektu guztiekiko menderatze-sistema bat da. Beraz, beharrezkoa da sistema horrekin eta gure buru, ohitura eta erakundeetan errotutako sexismoarekin eta horrek dakarren indarkeria guztiarekin amaitzea”.

Talde durangarraren ustez, “ezin dira alde batera utzi horrelako mezu deskalifikatzaileak, ez bakarrik faltsuak eta suntsitzaileak direlako, baizik eta matxismo zaharkituena bultzatzen dutelako”. Andereak elkarteak “bat bera ere pasatzen ez uzteko” dei egin die durangarrei eta baita “gure eskubideak, gogor eta luzaroan lortutakoak, defendatzeko, inoiz ez baitaude bermatuta” ere.